Tukang Obyek

TUKANG obyek, bahasa kerennye di sebut mediator. Siape nyang nggak kenal nyang namanye tukang obyek. Di Tanah Betawi ‘ni kesehariannye pade keluyuran kadang nyari pembeli dan kadang nyari penjual. Kagak di kantor, rumah, kebon, ampe-ampe di kuburan pun ade. Emang ‘ni kerjaan nyang buat orang pade kegranjingan alias ketagihan bin nyandu.

Roman-romannye apaan aje mao ditawarin, tanjain atawa dipasarin. Ampe-ampe tempat die ngeyub pun dipasarin. Mangnye pade mo tinggal di mane? Walhasil, pade nangkring di pohon ninjo ‘ntar. Lebih baik ninggal bumi daripade di tinggal bumi, lacur idup kite cing! Dalem permasalahan obyek-mengobyek, sangking cerdik dan berlebihan dalam menyiasati akal-akalan demi kebutuhan perut, berbagai cara dihalalkan untuk mencapai tujuan tertentu sampai-sampai sikut kiri sikut kanan. Kayak politisi prinsipnya; kage ade musuh abadi dan temen abadi nyang ada cuman keuntungan abadi.

Bicara Betawi, kalo kita itung-itung orang Betawi nyang jadi tukang obyek bejibun kali yeeee. Buat nyang serba ngepas mangnye mo ngapain lagi? Pendidikan pas-pasan, SDM nangkring, pa lagi pengalaman. Nyang kagak kuat idup bersaing dan mo megang duit gede aje, roman-romannye belah mane aje kalo ada pojokan mo maen ukur aje. Rade prihatin emang kalo nyadarin mayoritas kaum Betawi di tanah kelahirannye kian terkikis ame derasnye arus urbanisasi dan zaman serba canggih yang membuat ‘tuan rume’ pade merad ke pinggiran ibu kota ini.

Ade cerita tentang orang tue nyang ajalnye bentaran lagi dateng. Dia kumpulin semue anak-anaknye. Sang anak punye prasangke baik ame babenye, lalu sang anak bisik-bisik ame saudaranye: “barangkali kite di kumpulin mo ade wasiat pemecahan waris nih,” bisiknye. Setelah kumpul semue, si babe kasi pesen ‘ma anak-anaknye. “Tong, Neng, tulung lu pade ingetin nih pesen gue: tuh tanah nyang di pojokan nyang di huk, jangan lu pade jual, kalo gue udeh kaga enti.” Salah seorang anaknye nyeletuk, “mangnye ngapa Beh tanah nyang ‘ntu gak boleh dijual. Pan saudare aye banyak, gimane ngecaknye ‘ntar?” Babenye nyaut: “bukan begitu, Tong. Ngape gue ngelarang lu pade jual tanah ‘ntu, lantaran tuh tane orang bukanya tane Babe. Biar lu tau pade…”

Intermezo tersebut menggambarkan 99% kehidupan orang Betawi tempo doeloe penghasilannya dari hasil bumi. Mao pade pegi haji, nyantrenin anak, dan lain sebagainya. Anak-anaknye pade dididik ilmu agame. Buat orang Betawi tempo doeloe, pelajaran agame nomoer atu diberikan pade anak-anaknye. Biar anaknye pade jadi orang bener dan minimal bise ngedoain orang tuanye kalo mereka ude pade abis kontraknye idup di dunie. Namun sebaliknye, di mane sang orang tua tersebut egois alias mementingkan jeroannya doang, walhasil sang ahli waris hanya mendapatkan warisan cerita semata, katanya tanah eni bekas tanah engkong gue, tanah eni bekas tanah babe gue, nyang keluar cuman pepesan kosong doang dan hisapan jempol semate.

Emang dari dulu nyang namanye orang nyang ditakutin kagak ade. Namun orang nyang disegenin tuh banyak, soalnye di atas langit ade langit lagi. Jadi kite kaga perlu jadi jagoan, mendingan kite jadi orang yang arif dan bijak sane biar di mane-mane kite di segenin orang. Ok, cink…..

Arepan nyang kite mao, mari kite jadi tuan rumah nyang ramah, dapat mengayomi diri kita, keluarga, dan lingkungan sekitar. Nyok, same-same berfikir serte berangan-angan: andai ibu kota pindah ketempat lain dan kite dah gak bise bertengger di kampung endiri, walhasil kite mao kage mao bakal ngikut berbondong-bondong berurbanisasi mengikuti di mana ibu kota berada. Jadilah Betawi nyang suka merantau dan dapat pulang kampung kalau lebaran. Asyiiiik… pulang kampung, Ciiiiiiiiiing!

by jamiel loellail rora

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: