PUYENG

Oleh Jamiel Loellail Rora


HARI masih anget. Matahari yang belom lama nongol masih ramah mancarin sinarnya. Seperti biasa, sama ama hari-hari kemaren, pagi itu Naming duduk uncang-uncang kaki sambil baca koran Seputar Betawi.
Semenjak anaknya yang bontot dagang koran, kelakuan Naming emang jadi kayak orang gedongan. Saban pagi baca koran buat nambah wawasan. Bedanya cuma di temen doang. Kalo orang gedongan baca koran ditemenin ruti ama susu, Naming ditemenin kopi kentel ama dua potong pisang goreng.
Itu juga kalo bininya dikasih duit belanja rada lebihan dikit. Kalo dikasih duit belanja ngepres, jangankan disediain kopi kentel ama pisang goreng, mau ngopi aje Naming kudu nyonyol dulu ame bininya yang emang rada pedit kalo udah pegang duit.
“Bujug buneng,,,, cek-cek-cek,” Naming bedecak  sambil geleng-geleng kepala. “Kalo begini mah menurut gue pemerentah kagak punya rasa kesian barang metet ame rakyatnye,” gerutu Naming sambil terus manteng berita yang dibacanya di koran Seputar Betawi.
“Baca koran sih berisik banget. Perasaan gue orang-orang tuh kalo baca koran anteng-anteng aje. Nah elu kok baca koran jadi kayak orang nyang kena sakit tipes, ngaco kendirian aje!” kata Kibun yang tau-tau udah berdiri di samping lakinya.
“Pegimane kite kagak jadi orang nyang kena tipes kalo makin ari idup kite makin dibebanin ame urusan pemerentah nyang kagak becus ngurus negeri eni,” sahut Naming sambil membanting koran ke meja.
“Lha kok bise-bisenye elu ngomong begitu?” tanya Kibun kepengen tau.
“Tuh, kata koran pemerentah bakal naekin TDL alias tarif dasar listrik!” terang Naming. “Ape kagak punyeng nih kepale lantaran bakal makin dalem aje ngerogoh kantong buat bayar listrik. Mending kalo ni kantong banyak isinye. Nah kalo kopong-melompong?” lanjut Naming sambil garuk-garuk kepala.
“Makanye, jadi orang tuh yang getapan dikit kalo nyari duit. Nah eni kalah ama anak kendiri. Anak mah bangun pagi-pagi terus jalan nyari duit sementara babenya masih ngopi aje ame ngerokok!”
“Ati-ati lah Bun kalo bicare,” Naming yang berasa diolok-olok bininya langsung mendelik. Darah tingginya langsung kumat. “Pagi-pagi ude ngajakin ribut aje. Dasar bini gak punye bakti luh ame laki!” lanjut Naming sambil ngebanting puntung rokoknya.
Kibun yang tahu persis adat lakinya lantas nyengir, coba ngademin perasaan lakinya yang lantas panas lantaran ngedenger omongannya tadi. Lalu katanya, “Eh, Bang, ape nyang elu puyengin sekarang eni ude gue rasain dari kemaren-kemaren. Belanjaan dapur tuh harganye ude pade nyekek leher lantaran listrik mau naek. Mending kalo elu nambain duit belanje, pan nyang ade duit jatah dapur malah seringan elu kentit buat beli rokok!”
“Makanye elu kudu engeh, Bun. Kite idup sengsare begini lantaran pemerentah kagak becus kerjenye. Nah coba aje elu bayangin, masa kite bisa idup sengsare di negeri nyang kekayaan alamnye belimpeh?” kata Naming ngalihin omongan bininya yang udah nyerempet-nyerempet kebiasaannya ngentit duit jatah dapur buat beli rokok. “Coba kalo penyakit para penggede nyang suka korupsi bise diilangin, kite nih selaku warge negare kagak bakalan menderite begini. Kite bakalan bise idup makmur,” lanjut Naming.
“Kalo soal makmur mah kite eni ude makmur, Bang. Alias punye rumeh sepetak, kasur butut, ame sumur!”
“Elu kalo diajak ngomong serius bawaanye mao becande aje.”
“Abis kalo gue juga ngikut ngomong serius bisa-bisa darah tinggi luh kumat lagi,”
Merasa kena sindir bininya, Naming cengengesan.
“Cengengesan aje bise luh! Ude pegi kemane kek nyari duit. Ngapain di rumeh aje cuman ngabisin kopi ame aer panas,” omel Kibun dalam hati.
“Nah elu ngape ngeliatin gue pake melotot begitu?” tanya Naming rada heran ngeliat mata bininya yang belo nyereng kearahnya.
“Ah, nggak…” kata Kibun tergagap sambil buru-buru nundukkin kepala. “Gue mau masak dulu deh. Kasian entar kalo si Mamat pulang nasi ampe belom mateng,” lanjut Kibun sambil melangkah lebar menuju dapur.
“Gue juga mao keluar, Bun. Kali-kali aje kalo ikhtiar mah entar ade aje rezeki yang nyangkut. Di rumeh juga ngapain cuman nambah puyeng doang,” kata Naming sambil bangkit dari duduknya.
Kibun menghentikan langkah. Dia balik tubuhnya yang rada gembrot lantaran suntik KB. “Bener, Bang. Rezeki mah emang kudu dicari lantaran dia gak bakal dateng endiri,” kata Kibun ama lakinya. Sementara hatinya ngedumel, “Nah kalo elu aje di rumeh makin puyeng ape lagi gue nyang ngeliatin elu batangtang-betengteng di dalam rumeh kayak ayam jago kagak punye musuh. Ujung-ujungnye pan elu bakalan ngorok lagi. Bini mane nyang kagak puyeng ngeliat laki yang masih doyan makan tapi cules banget ama nyari makan? Naming… Naming… punye anak ude tige masih kolokan aje kaye anak baru gede!”
“Gue berangkat dulu, Bun. Assalamu’alaikum.”
“Wa’ailuksalam,” sahut Kibun singkat.
Sepeninggalan Naming, Kibun langsung sibuk bekutet di dapur buat nyelesaiin tugasnya. Dia kagak kepengen anak bontotnya pulang dagang koran, nasi ame lauk pauknya belum pada mateng. Apalagi abis dagang koran si Mamat biasanya langsung siap-siap buat ke sekolah. Dalam hati, Kibun bersyukur banget punya anak kayak Mamat yang sungguh-sungguh usaha biar bisa nabung buat kuliah lantaran sadar kedua orang tuanya hidup senin-kemis.
Kalo puase Senen-Kemis pahlenye banyak. Nah, kalo idup senen-kemis?” bisik hati kecil Kibun sambil mesem-mesem.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: